domingo, 27 de septiembre de 2009

Un chikitiko Manuel de Jenealojiya Konverza




1. Empyeso por lo fasil. En algunos pokos kavzos, se guadro la jenealojiya entera. i se puede sigir fin a oy. Es el kavzo de Shalomoh ha Levi, ke se konvirtio komo Don Pablo de Santa Maria. Tambyen los de la Cavalleria, nombre Judyo konservado por los Konverzos, fin a oy. Las famiyas ke desyenden de la novlesa pueden rekomponer fasilmente estas jenealojiyas. Tambyen Rui Kapon guadro su alkunya Judya al konvertirse i su linaje paso a yamarse Pacheco, uno de los mas novles (ma no todos los Pachecos de Espanya pertenesen a este linaje) Kuando aze anyos oyi avlar de Don Abraham Kapon, Judyo de Yugoslavya, pyensi ke pertenesiya a la rama de la famiya ke no se konvirtyo.

2. En otros kavzos, se save la alkunya Konverza, ma no la Judya, i se puede sigir el linaje fin a oy, komo en la famiya Bernuy; ma eran paryentes de los Zabarcos de Avila, i esta es una alkunya Judiya. Si uvyera Zabarcos en la diaspora Sefaradi, seriyan paryentes de los Bernuy!

3. Los kinze linajes de los Xuetes de Mayorka se konsideran tradisyonalmente de asendensya Judiya, anke las alkunyas seyan Kristyanas. Son Aguiló, Bonnin, Cortès, Forteza, Fuster, Martí, Miró, Picó, Pinya, Pomar, Segura, Tarongí, Valentí, Valleriola y Valls. Algunas de estas alkunyas pueden ser las orijinales Judiyas.

4. Ay kavzos en ke la alkunya de oy es la mezma ke la Judiya antiga, anke no se konservaron las jenealojiyas, por ekshemplo, los Maimon, Abulafia, Bensusan, Salom, puedeser los Chacon (Checon o Chicon) de Ocanya.

5. A las vezes, se puede tentar de dedusir la Alkunya antiga, konosyendo la estorya i las sirkunstansyas. Por ekshemplo, en un puevlo mui chiko, la Puente del Arzovispo, de Toledo, aviya un Rav yamado Don Yento Arragel. Dospues se ve una famiya puedeser Konverza yamada Villarroel. Trokaron sus alkunya i eran sus desendyentes? Si ay Arragel en la Diaspora puederiyan ser paryentes i una analiza de Y-ADN, de los varones ke yevan esta alkunya, seriya enterezante.

5. Otras alkunyas pueden ser Konverzas, ma puede aver duvdas. Aviya Konverzos i Kristyanos kon la mezma alkunya. La majoriya estan en este kavzo. Pueden vuskarsen munchas senyales, por ekshemplo, las profesyones tradisyonales de la famiya, komo las de platero o kontador, o los eskudos de armas de algunos linajes novles.

En estos, es enterezante el lis (fleur de lis) Puede representar la desendensya de los Reyes de Fransya, ma si no ay esta desendensya, puede representar la Shoshanah o el Magen Davis, komo dize Atol Bloomer. Mirad ke tyene sesh angulos.

Tambyen es enterezante el Leon, ke puede representar el Leon de Judah (ma no siemre)

Por ekshemplo, no se puede asigurar ke la famiya De Merkado, de Ubeda, seya Judiya, ma en eya se dan kuatro sirkustansiyas ke lo apoyan:
a. El sinifikado, ke es komersyal (komo De la Kal)
b. En su eskudo ay kuatro lises en los kantones
c. Y un leon en el sentro
d. Munchos De Merkado de Granada fueron prosesados por la Enkisizyon. Eran los mezmos?

Si uvyera De Merkado en la Diaspora se puederiya azer el Y-ADN

No hay comentarios:

Publicar un comentario en la entrada