martes, 12 de abril de 2011

Deus sive Logica


Me dishes ke no se puede demoztrar la eksistensya ni la no eksistensya del D.io i es vedra ke no se puede azer ni lo uno ni lo otro, de ke no es un ovjeto. El D.io es la demostrasyon de ke eksiste la demostrasyon.

Los Gregos deskuvreron ke eksiste la Lojika; la realitad es lojika, komo la ve la syensya; esta ordenada, tyene koerensya, sensyo.

Mezmo si keremos argumentar kontro la Lojika, es menester ke uzemos la Lojika.

La Lojika no se ve, no se toka, ma esta delantre de mozos, inchendo la realitad.

La Lojika esta por ensima de mozos i de muestra voluntad; kiyeramos munchas vezes ke no eksistyera; ma eksiste; lo lojiko es lo lojiko. Tenemos ke ovedeser, anke muestro orguyo kede ofendido! Mos revelamos syempre kontra la Lojika, sonyamos kon un mundo dispuesto a muestro plazer, asigund muestra voluntad, ma la Lojika mos aze bashar muestras orguyozas kavezas!

No entendemos munchas vezes la Lojika, el sensyo de las kozas del Universo; ma kale ke penzemos ke es lojiko, de ke si no fuera lojiko, no puederiya eksistir, deke no seriya koherente, todo chokariya; ni mozotros puederiyamos avlar kon lojika, ni eksistiriyamos de ke la Lojika rije muestros puerpos mezmos.

No entender la lojika de una parte de la realitad no kere dezir ke no eksista, ma ke no la entendemos; la realitad se forma kon lojikas kada vez mas komplejas; una naranja tyene una forma paresida a una esfera lojika, ma no yega a la perfisyon de la esfera; ma kreygo ke sus irregularitades respekto a la lojika de la esfera sigen las formas de las matematikas del kaos...

Para entender lo ke kero dizir, simlemente trokad el byervo Lojika por el byervo el D.io

Pitagoras saviya ke el numero (la mezura, las Matematikas, la Lojika) es el fundamento de la Muzika i de todas las kozas; puedeser ke Pitagoras se ambezara en el Templo de Yerushalayim; en el , en su Santo de los Santos, aviya solo tres kozas: una mezura de longor, una mezura de pezgor, una mezura de volume...