lunes, 27 de diciembre de 2010

El Judezmo es etika




Publicado en Sefaradi Muestro


El Judezmo es ensima de todo el siyimyento de un solo D.io por la famiya de Yaakov;
mas ensima, es dende syemre, dende la tradisyon de la dita famiya, una manera de ser etika de ke el D.io lo kere.

El mythos del Arbole de la Syensya del Byen i del Mal es ekstraordinaryamente enteligente: el Byen y el Mal estan ensima del ombre, el no puede desidir lo ke es bueno o malo, si lo isiera, "seriyash komo dyozes", i kuando lo tento, kada vez fue un dezastro. Es el D.io ken mete la Ley morala, no el onbre, tan orgulyozo! Este es el monoteyismo etiko!

En Oseas, se topa un teksto ke es komo un Dekalogo eskematiko, puedeser primitivo, ke representa lo ke ya se sentiya malo en el syeglo 8 AC :

“No ay ni vedra (emet)
ni afeksyon (hesed)
ni konosensya del D.io en esta tyerra
Perjuran
myenten
matan
roban
adulteran
vyolentan
sangre i mas sangre” (4, 1-2)

Syempre el Judezmo fue etiko.

Ay un otra koza ke dishir. La Filosofiya sige un metodo rasyonal, ma la rason no es la unika manera de konoser. Tambyen konosemos por entuisyon, esta forma de pensamyento no rasyonala, no graduala, kuando amamos (o kuando odyamos), kuando sentimos la veltad estetika ke no se puede eksplikar...

La etika se konose munchas vezes por entuisyon: savemos, sin ke seya menester eksplikarlo, lo ke esta byen i lo ke esta mal.

Ma la rason i la entuisyon son dos formas de konoser ke se komplementan la una a la otra! La filosofiya i le etika Judiya son komplementaryas asina!

domingo, 26 de diciembre de 2010

Poka Eskritura delantre del D.io

Antyer tuvi komo una ispirasyon al eskrevir esto: esto kansada de ke todo lo ke tyene ke ver kon las Eskrituras (Tanah, Evanjelyos, Koran) seya tan diskutivle i todo lo je tyene ke ver kon el D.io seya tan simple.

De pronto, pyensi ke lo ke es de las Eskrituras vyene del ombre i lo ke vyene del D.io es del D.io.

Lo ke vyene del D.io es ke seyamos menesterozos de El. Tantas vezes...! Al plazermos una muzika fina las lagrimas, vyendo la Ermozura! Al montar en un avyon, kon myedo, i no tener otra koza ke metermos en sus manos!

Ke simple todo! Ensima de esto, mozotros los Judyos o desendyentes de Judyos savemos un otra koza simple: ke dende 4.000 anyos manko muestros Padres izyeron un akodro kon el i ke dende estonses sovrebivimos. Punto.

Dospues vino la Eskritura, eskrita por los ombres, eskrive lo ke pazo, ma se puede diskutir, muncho. Kale meldarla, respetarla, ma anke estudyarla kritikamente. Es solo umana.

Al D.io no se le diskute. Se le syente o no se le syente. Se le deseja, anke no se sepa. Esta ensima de mozotros, anke no keramos.

viernes, 24 de diciembre de 2010

Retorno dospues de mas de un anyo



Kayadez durantre mas de un anyo. Oy torno a eskrivir en esta pajina.

Pazaron munchas kozas por medyo.

Primer, yo vide en klaro ke e menester el D.io, ke es el Enfinito i la Perfisyon de la ermozura i la pureza.

Segund, yo komprendi ke los Padres guadran la tradisyon del D.io komo un rekodro de famiya, livre afilu de las letras del Tanah ande se pyerden ken pyensan ke se guadra al D.io por lo ke dishe el Tanah, i no porke semos su puevlo i guadramos su memorya.

Esta enportansya del livro es una idolatriya komun al Judezmo Rabbiniko, a los Kristyanos i a los Islamikos. Solo el D.io es vedradero!

Se enredan en la enterpretasyon de sus letras komo ken se enreda en un kontrato.

Ma el Tanah no es un kontrato eskrito. Es solo un testymonio eskrito del paso del D.io de la Kaza de Yaakov por la tyerra. Este testymonyo, komo es natural kon tantos eskritos antigos, esta inchido de sovreskrituras i duvdas.

Yo no konfyo en el D.io por el Tanah. Konfyo en el de ke el puevlo de mis Padres aksepto una Alyanza kon el, i tres o kuatro mil anyos dospues muestro puevlo sovrevive (i los Shomronim, mas miraculozamente ainda)